HUN KA NEI NAWH

                                                                                                                         Dr. Chawngrolien Chonzik

 (22/5/2011):May 19 zingkar khan Tv. Rosanglien Puruolte in a mi hung phone a. “HWSG News May 22 (Pathienni) edition a suok dinga insuo ding article hung ziek thei i ti?” ti a mi hung indon a. “Hun ka nei naw em a, ka ziek hman dim ka hril thei naw ngei, hung tum phot ka ti aw,” tiin ka don a. Ka hang ngaituo kir chun, “hun ka nei naw em a” ka ti chu kan zak letling lem a. Ni tina ka hun hmang dan ka hang sui chet chet chun, hospitala damnawhai enkolna sin ka thaw zo hnung khoma ka nuom zawng thil tangkailo thaw ding chun hun ka nei thei zing hlak si a. Chuonghai chu ka ngai poimaw lem hlak leiin thil tangkai ding thawna “hun ka nei naw” lem a nih. 

A ni hrim a, eini rawi chu “hun ka nei nawh”, “kan hman nawh” zuk ti tla rok hi ei ching khop el a. Hang ngaituo chet chet inla chu keia ang tho in ni tawl ka ring. Hun hi mitinin ei nei, thil dang iengkhom neilo hai khomin hun chu an nei a nih. Ei thil nei laia a hmang ei thiem naw tak a ni bok a nih. Mi var le mi hmingthang tak tak hieng, Mother Teresa, Albert Einstein, Mahatma Gandhi le Thomas Jefferson hai le khom ei hun nei dan an ang seng a; nikhata darkar 24 seng tho a nih. An hun an hmang thiem leiin an hlawtling a, an hming an thang a, hun hmang thiem le thiemnaw in a mi the tawl a nih. Mi buoi taktak le hun hmang thiem haiin “hun ka nei nawh” an ti ngai nawh. Thomas Jefferson chun, “Um meimei tum naw rawh. Hun khawral ngailo hai chun “hun ka nei nawh” tiin an complain ngai nawh. Ei thaw zing chun thaw zo thei a lo tamzie hi mak tak a nih” tiin a hril a. Hun ka nei nawh ei ti chun hun ei lo khawral hlak lei a lo ni lem a nih.

Ieng leia hmangloa hun ei khawral hlak am? Hun hlutzie ei hrietnaw lei a nih. Hun hi ei hau taluo leiin ei hlutsak naw a nih. Thil iengkhom hi ei hau pha ei hlutsak naw a, a vang pha a hlu bik hlak a. Ka nu’n rengthei bil a siem lai chun kan hau thei em leiin kan hlutsak emem naw a, a fak khom kan fak pei rak nawh. Amiruokchu, Guwahati bazaar ah, rengthei um huna chun ngaihlu ememin a man a tam khoma fak ngeingei tumin kan chawk hlak. Hiengang deu hin ei hun neiin a mi dai naw pha a hlutzie ei hriet chauh hlak a nih. 

Hun hlutzie hretuhai chun indik takin hun an hmang hlak. Hun hlutzie fel lema hriet theina dingin internet a inthoka ka hmu a author hriet chieng lo hi tha ka ti em leiin ka hung zieksa a nih. –

Kum khat hlutzie i hriet nuom chun

inchuklai kum tawp exam fail kha indon rawh.

Thla khat hlutzie i hriet nuom chun

nupui thla kimlo nau nei kha indon rawh.

Kar khat hlutzie i hriet nuom chun

kar tina suok chanchinbu editor kha indon rawh.

Darkar khat hlutzie i hriet nuom chun

inngaizawng inhmuhai kha indon rawh.

Minit khat hlutzie i hriet nuom chun

rel fe ding nang hmanlo pa kha indon rawh.

Second khat hlutzie i hriet nuom chun

eksiden tuok thel zo hlol pa kha indon rawh.

Milisecond khat hlutzie i hriet nuom chun

Olympic games a silver medal hmu pa kha indon rawh.

Hun hlutzie hi ngaituo zing hlak inla chu ei Welfare sports khom kha a hun takah ei tan thei ring a um a, a hun takah tan inla chu games item khom tamtak ei zo hman ding a na. Hun hmang thiem tieng panga hma tieng pan ei tiu a. Ei sport hun nawka chu a hun takah tan thei dingin thang la seng ei tiu. Hlawtlingna lampui kalbi poimaw pakhat chu hunbi hmang indik hi a nih.

Ei hun nei seng hi a hlutzie hre thar nawk seng ei tiu a, hun hmang indik tum seng bok ei tiu a, “hun ka nei nawh” ti thei ding khopa um thawveng le thil tangkailo thaw bansan tum seng ei tiu.

Posted in: Articles